Мемлекет басшысының Жарлығына сәйкес, жыл сайын барлық деңгейдегі әкімдердің халық алдында есеп беруі дәстүрге айналды.
Бекітілген кестеге сәйкес, биылғы жылы бұндай науқан қаңтардың 16-нан 31 – не дейін өткізіледі. Барлығы 68 есептік кездесу өткізу жоспарланды. Кездесу барысында ауыл, кент және ауылдық округ әкімдері 2016 жылда атқарған жұмыстары жайлы баяндап, алдағы уақытқа белгілеген бағыт-жоспарларымен таныстырып өтеді.
Сонымен, қаңтардың 17 және 18 күндері кезекті кездесулер аудан әкімінің қатысуымен Қызылқайын, Новоузенка, Ақтөбе, Жаңаталап және Қаражар ауылдарында болып өтті.
Ауыл әкімдерінен кейін, ауылдық мал дәрігерлері мен учаскелік полиция инспекторлары да есеп беріп, тұрғындардың көкейдегі жүрген сұрақтарына жауап берді. Кездесулер барысында көтерілген барлық мәселелер хаттамаға енгізіліп, аудан әкімінің бақылауына алынды.
Еске сала кететін жайт, ауылдық округ әкімдерінің есептік кездесулерінен кейін аудан әкімінің есептік кездесуі ақпанның 7 –сі күні Ботақара кентінде өткізіледі.